મિઝોરમમાં ખાણ ઘસી પડતા 10નાં મોત: નેશનલ હાઈવે પર હુનથાર ખાતે ભૂસખ્લન થતા રાજ્યને દેશ સાથે જોડતો રોડ સવારથી બંધ
![top-news](https://gujaratvandan.com/public/uploads/images/newsimages/GujaratVandan28052024_060237_Mizoram 1.webp)
- 28 May, 2024
મિઝોરમના ઈઝવાલ જિલ્લામાં એક પથ્થરની ખાણ ઘસી જતા 10 મજૂરોના મોત થયા છે. જ્યારે ઘણા મજૂરોની શોધખોળ હાલ ચાલી રહી છે. પોલીસ ઘટના વિશે માહિતી આપતા જણાવ્યું હતું કે ઘટના સવારના 6 વાગ્યાની આસપાસ બની હતી. ઈઝવાલ શહેરની બહાર દક્ષિણમાં મેલથુમ અને હેલીમેનની વચ્ચે પથ્થરની આ ખાણ આવેલી છે. ઉલ્લેખનીય છે કે રિમેલ વાવાઝોડાના પગલે હાલ સમગ્ર મિઝોરમમાં વરસાદ થઈ રહ્યો છે અને તેના કારણે પથ્થરની ખાણ ઘસી પડતા આ દુર્ઘટના સર્જાઈ હતી.
દુર્ઘટનાના પગલે પથ્થરની ખાણની આસપાસ આવેલા સંખ્યાબંધ ઘરો પણ નાશ પામ્યા હતા. દુર્ઘટના પછીથી પ્રશાસને મૃતકોના મૃતદેહોની શોધખોળ કરીને તેમના પરિવારના સભ્યોને સોપ્યા છે. જોકે પોલીસે જણાવ્યું છે કે હજી પણ ઘણા લોકો કાટમાળની અંદર ફસાયેલા છે. તેમને બહાર કાઢવામાં આવી રહ્યાં છે.
દુર્ઘટના પછી તાત્કાલિક ધોરણે બચાવ અને રાહત કામગીરી શરૂ કરવામાં આવી હતી, જોકે ભારે પવન અને વરસાદના કારણે આ કામગીરીમાં વિલંબ સર્જાયો હતો. ભારે પવન અને વરસાદના પગલે મિઝોરમમાં ઘણી જગ્યાએ ભૂસંખ્લનની ઘટનાઓ ઘટી હતી. તાજેતરમાં મળતી માહિતી મુજબ, 10 મૃતકો પૈકીના ત્રણ અન્ય રાજ્યના મજૂરો હતો, જેઓ પથ્થરની ખાણમાં કામ કરવા આવ્યા હતા.
સર્ચ ઓપરેશન દરમિયાન એક બાળક પણ મળી આવ્યું હતું, તેને તાત્કાલિક ધોરણે હોસ્પિટલમાં સારવાર માટે ખસેડવામાં આવ્યું હતું. આ દુર્ઘટનામાં હજી પણ મૃતકોની સંખ્યા વધી શકે છે. ઉલ્લેખનીય છે કે ઈઝવાલ સવારના 6 વાગ્યાથી સમગ્ર દેશથી વિખુટું પડી ગયું છે. રાજ્યના હુનથાર ખાતે ભૂસંખ્લનના પગલે રાજ્યને દેશ સાથે જોડતો રોડ જ હાલ બંધ થઈ ગયો છે.
આ સિવાય રાજ્યના આંતરિક રોડ પર પણ ભૂસંખ્લનની ઘણી ઘટનાઓ નોંધાઈ છે. ભારે વરસાદના પગલે તમામ શાળાઓને બંધ કરવામાં આવી છે. રાજ્યના સરકારી કર્મચારીઓને પણ હાલ રજા આપવામાં આવી છે. જોકે જે લોકો ઈમરજન્સી સર્વિસ સાથે સંકળાયેલા છે, તેઓને ઘરેથી કામ કરવાની સુચના આપવામાં આવી છે.